الفترة دى ناس كتير من أصحاب العمل بيسألو ” ( ليه اغلب الشركات او الاشخاص الى شغالين فى مجال التسويق الالكترونى اصبحو كدابين ونصابين ) ” ؟؟؟

وانا هنا مش جاى أعلق على السلوك المشين ده ولا جاى احلل سلوكهم ولا ليه بيعملو كده , ولا حتى جاى ابرر واقول ليهم بعض الاعذار , لاء انا جاى اقول أنك ” ( كـ صاحب عمل مستغرب شريك فى ده وبتدفعهم لـ ده ) ” !!!!!

.

عارف ان فى ناس كتيرة ممكن تنتقد كلامى بس زى ما قال كاتب شخصية ( شرلوك هولمز ) الشهير ( سير آرثر كونان دويل ) المقولة الى بحترمها جدا ” ( اذا أستبعدت المستحيلات فما يتبقى هوا الواقع مهما بدى غريبا ) ” فـ تعالو نتكلم ونحسبها بالواقع والمنطق بعيدآ عن المستحيلات من فضلكم .

.

دلوقتى مجال التسويق الألكترونى من الوظائف ( الغير ملموسه ) , يعنى ايه الكلمة دى ؟؟

يعنى هيا مش زى وظائف كتير نتائجها تقدر تتابعها ثانية بـ ثانية , لاء دى وظيفة غير ملموسة فى الغالب مش هتعرف الى بيدور جواها الا لو عندك خبرة فيها ومش هيبان نتائجها الا بعد مرور فترة من الوقت على حسب مجال العمل احيانا بيكون بضعة ايام واحيانا شهور .

وده الى بيخلى فيه مساحة كبيرة من النصب والاحتيال تدخل المجال ده بعكس وظيفة زى الجرافيك ديزاين مثلا الى نادرا لو لقيت شخص ( محتال ) بيدعى الخبرة وهوا معندوش خبرة وده لسببين .

.

السبب الأول : ( نماذج الاعمال ) _ وده شئ بديهى جدا لما تطلب جرافيك ديزاين وحد يقولك انه عنده الخبرة انك تطلب منه نماذج لاعماله ( اى التصميمات الى قام بيها فى السابق ) وبتتأكد من انها تصميماته وبالتالى بتتأكد من خبرته , لكن فى مجال التسويق الالكترونى لما تروح لحد وتقولو ابعتلى نماذج لأعمالك ( فـ ده وقبل اى شئ بيفهم الى ادامك انك حافظ مش فاهم ) لان ببساطه المجال ده مفيش فيه حاجه اسمها نماذج اعمال وقبل الانتقاد خلونا نعرف ليه الأول ,

.

لأن فى أحسن الأحوال الشخص الى بيمسك تسويق شركة او مشروع او اى ان كان فـ بعد تركه للعمل طبيعى انه بيسلم كل ده كل حاجه اشتغل عليها وبالتالى فـ مفيش حاجه يقدمها الا أسم الشركة الى اشتغل فيها لو العميل حابب يتواصل معاهم ويسأل عنه وفى حين شخص ترك العمل مش بيكون كلام الشركة ده عنه موثوق اوى سواء كان كلامهم كويس او سئ لان ف الغالب اسباب تركه للعمل بتكون مؤثرة على كلامهم ده ,

.

اما على أسوء الاحوال انو شغال فى مكان ما فى الوقت الحالى وفضل يبعت لحضرتك سكرينات عن شغله والاحصائيات وتقدم العمل وحملاته الاعلانيه فـ ده اسمه خيانه لصاحب العمل لو كان عمل كده بدون اذنه , ولو كان بأذنه فـ مظنش ان فيه صاحب عمل هيسمح لحد يخرج احصائيات شغله كلها لحد تانى لمجرد انو يوريلو هوا بيعمل ايه , ولذلك اعتبرت ده اسوء الاحوال لان الشخص عديم الامانه ده لا يمكن الوثوق فيه .

.

السبب التانى : ( الامكانيات ) _ ودى معناها ان حضرتك لما بتطلب من حد نماذج لاعماله ونفترض انه شخص عديم الامانه وخرج اسرار عمله الحالى او السابق ليك فـ هوا كل الى بيورهولك أمكانيات العميل مش امكانياته هوا , وعشان نفهم الجزء ده بمنطقيه بدون افكار خارجه من افلام خيال علمى , خلونا نفترض ان فيه واحد مثلا خبرته 70% ماسك شغل عميل على اده الموقع الالكترونى بتاع العميل ضعيف جدا وحملاته الاعلانية ضعيفه جدا جدا , وشخص تانى خبرته 40% ولكن قدر له انه ماسك شغل عميل مستواه عالى شوية ومن مسؤلياته مثلا موقع عالى الكفائة جدا وبيعمل حملات اعلانية بميزانيات عالية وامكانيات عالية , فطبيعى حضرتك ان هتلاقى احصائيات الشخص الثانى الى بعتهالك بتقول انو يتفوق على الشخص الاول بمراحل مع ان الحقيقة العكس تماما , عشان كده اى ان كان النماذج او الاحصائيات او الاعمال السابقه الى هيرسلها لحضرتك فـ هيا بتدل على امكانيات عملائة مش امكانياته هوا .

.

ايه ده امال ازاى اعرف خبرة الشخص وهل هوا خبير فى مجاله زى ما بيدعى ولا لاء ؟؟؟

ببساطه شديدة ان حضرتك تمشى فى الطريق الاصح مش الأسهل , عن طريق الانترفيو مع حد محترف ولو مش عندك الحد المحترف ده ممكن انك تتفق مع حد محترف ليه اسمه وسمعته وشهرته على انه يعمل الانترفيو مع المتقدمين للعمل اونلاين مقابل مبلغ من المال , والانترفيو ده هوا الامتحان الى هيبان فيه الشخص الخبير فعلا من مدعى الخبرة ( النصاب ) , وفيه برده اختبارات وأعمال تجريبية تجرب فيها قدرة الشخص ومهارته .

.

لكن حضرتك ي فندم بتقول ايييييييييييييه انا فى غنى عن كل ده !!! يبقى السؤال هنا ليه حضرتك جاى تشتكى ان اغلب الى بيقابلوك ف طريقك نصابين ؟

.

مش هنبطل بقى ثقافة اننا عاوزين نشترى الحاجه ام 1000 جنيه بـ 20 جنيه ومحاولة تحقيق المعادلة المستحيلة دى ؟؟

.

فى النهايه انا من سنين طويلة فيه جملة ديما بحب اقولها وارد بيها على الحالات الى زى دى .

( لو فتحت باب العشم مش هيدخل منه غير رياح النصب )

فـ ارجو عزيزى العميل انك تحدد موقفك مع نفسك قبل اتخاذ اى اجراء , وتشوف هل حضرتك مش حابب تعمل الصح والامور المعقده والمكلفة دى كلها ومستعد للمخاطرة يبقى ياريت حضرتك مش تشتكى كل شوية وتطعن فى وظيفتنا لان حضرتك مش عايش فى جنة الفردوس ولا كل الى حوليك ملائكة .

ولو حابب تمشى بشكل صحيح يبقى المفروض تعرف الطريقة الاصح والانسب للعمل مهما كان تكليفتها لمصلحة العمل عندك .

.

فـ النهاية بعتذر على الأطالة وأتمنى اكون قدرت افيد حضرتكم بشئ , لكم كامل الاحترام والتقدير .