السلام عليكم .. تعالو النهارده نصلح مفهوم جديد منتشر حاليا عن التسويق الالكترونى او الاعلانات الممولة وأتمنى كلامى يفيد شريحه كبيرة من الأشخاص

‭

منتشر حاليا كلام بيقول ( ان المعلنين لو عاملين حسابات جديده بميزانيات صغيرة الفيس بوك بيدعم الحسابات دى وبيحققلهم نتائج ممتازه عشان يجعهم على مضاعفة ميزانيتهم وبعد ما يضاعفو ميزانيتهم بيشيل الدعم والنتائج بتبقى سيئة ) وبيقولو كمان ان المفروض لما تعمل اعلان بـ 50 جنيه ويجيلك 20 رساله يبقى المفروض لما تعملو بـ 100 جنيه يجيلك 40 رساله , وبتكلمو بثقة زى ما بيقولو بناء على تجربتهم , طيب هل الكلام ده صحيح ؟؟

للأسف جزء صغير من الكلام ده صحيح اما باقى الكلام كله ومجمل الموضوع والمفهوم الأساسى خاطئ تماما ,

وعشان نعرف نصلح المفهوم تعالو سريعا وبختصار نعرف دورة عمل الأعلان الممول نفسه لانها هتوضح كتير جدا من الأمور .

اولا فيه فرق بين الأعلان التجارى الممول وبين الاعلان الترويجى بس عشان مش اخرج من سياق الموضوع وانجرف فى شرح طويل خلينا نركز كلامنا على الأعلان التجارى الممول .

1_ المعلن سواء كان متخصص او مبتدئ او من الهواه لما يجى يعمل اعلان ممول فى البداية بيبدأ بأنشاء الحملة الأعلانية ودى الى بتحدد للفيس بوك الهدف الى العمل عاوز يوصلو والميزانية الى راصدها عشان يوصلو والحد الاقصى للنتائج الى مش عاوز يدفع أكتر منه .

2_ بعد كده بيبدأ ينشئ المجموعة الأعلانية الى بتتضمن المكان الى عاوز يعلن عنه وتحديد وسيلة التفاعل الى بيختارها وعاوز الفيس بوك يركز عليها سواء المراسلة او التحويل او او او …. ألخ , وبيحدد المدة الزمنية الى عاوز الفيس بوك يوصلو لهدفو فيها , وبيحدد اوقات عمل وايقاف الاعلانات , وبيحدد الاستهدافات الى بيستهدفها واماكن ظهور الاعلانات وغيرها من التفاصيل .

3_ بعد كده بيشئ الأعلان نفسه سواء عن طريق اختيار احد المنشورات للاعلان عنه او انشاء منشور جديد والقوالب الى عاوز يشتغل عليها , وطرق التتبع وما الى ذلك .

‭

كده احنا عرفنا نعمل حملة اعلانية كامل وارسلناها للمراجعه والتقيم وان شاء الله اتوافق عليها , ايه بيحصل بقى بعد كده ؟؟

‭

ياريت نركز بقى فى كل الى جاى عشان بأذن الله هيحل الغاز كتيرة جدا جدا لحضرتكم وهيساعدكم على النجاح ان شاء الله

‭

والا والنقطه الى محدش بيتطرق ليها نهائيا هيا فترة مراجعة الاعلانات عبارة ان ايه وايه لازمتها وليه اعلانات بيتوافق عليها بسرعه واعلانات تانيه بتتأخر فى الموافقه عليها واعلانات بتترفض ؟

‭

طبعا بشكل عام اغلبنا عارفين ان فترة المراجعه دى الفيس بوك بيحدد الاعلان بيخالف سياساته ولا لاء وبناء عليه بيوافق عليه او بيرفضو , لكن دى مش الحقيقة الكاملة .

‭

فترة المراجعة دى بتكون فترة للمراجعه والتقيم وبتمر بعدة مراحل وعشان نفهم بردو الجزئية دى لازم نعرف اننا بنتعامل مع ذكاء اصطناعى مش بشر وده حلو ووحش فى نفس الوقت , لان الذكاء الاصناعى لا منه مجرد برنامج متبرمج على شئ معين نقدر نتلاعب معاه , ولا منه بشر بياخد بمقتضيات الامور نقدر نبرر ليه حسن نيتنا , الذكاء الاصطناعى بيجمع ما بين امرين مهمين , الامر الاول هوا مجموعة من السياسات والقواعد والقوانين تقدر بـ مئات الالاف من القواعد والقوانين الى بيطبقها على اعلانك بسرعه كبيرة جدا عشان يحدد ايه الى ينطبق عليك منهم وايه الى بيخالف ده , والامر التانى هوا الاستيعاب والمقارنه زى ما بتشوفو فى افلام الخيال العلمى كده ان الذكاء الاصطناعى بيحاول يتعلم ويتطور عن طريق محاولة فهم اى شئ جديد بالنسباله .

‭

وعشان كده فترة المراجعه بتمر بأكتر مرحلة هوضحهم لحضرتكم ان شاء الله دلوقتى .

المرحلة الاولى : مراجعة القوانين , الى زى ما قولنا عبارة عن مئات الالاف من القوانين الى بيطبقها الذكاء الاصطناعى على اعلانك بسرعة خارقة وبيشوف انتا بتخالف حاجه فيهم ولا لاء .

المرحلة الثانية : مراجعة السياسات , ودى الخاصة بمعرفة نشاطك والى بتقدمو وهل هوا مناسب لمجتمعك ومعايرو ولا لاء .

المرحلة الثالثة : التقيم , ودى الى محتاجين نركز عليها جدا جدا , لان فى المرحلة دى الفيس بوك بيقيم اعلانك من حيث الجوده من خلال مراجعة جودة الصورة او الفيديو وجودة المحتوى الى ف الصورة او الفيديو حجم الخطوط ونوعها والالوان ونوعها معدل الخطوط بالنسبة للرسوم , والمحتوى المكتوب وجودتهم ومدى قربة من المحتوى الى بتقدمو , وغيرها من الامور الى محتاجه شهر تتشرح فيه لانها فعلا اكتر مما اى حد يتخيل وفى النهايه الفيس بوك بيقيم اعلانك بنسبة مئوية معينة , وبعدين بيقسم جميع الاعلانات فى كل مجال محدد لمجموعات , كل مجموعة بتصنف من حيث نسبة الجودة المئوية ليها .

‭

عارف ان الموضوع معقد شوية بس نحاول نبسطو مع بعض .

يعنى مثلا مجال العقارات , الفيس بوك بيقسمو لـ 10 مجموعات , المجموعة الأولى الى نسبة جودة اعلانها بتكون من 0 الى 10% , ثم المجموعة التانيه الى جودة اعلانها بتكون من 10 الى 20% , وهكذا لحد المجموعة العاشرة الى بتكون جودة اعلانها من 90 الى 100% , وعشان كده والنقطه الغايبة عن ناس كتير جدا , اكبر علماء العالم فى مجال التسويق الالكترونى ديما بينصحو بأنك لما تيجى تعمل اعلان تركز اوى على المحتوى المكتوب والصورة او الفيديو حتى لو هتصرف عليهم اضعاف ميزانية الاعلان نفسه , لان التحسين الى بيقدمو الفيس بوك للاعلانات بيختلف من مجموعة لاخرى وده طبعا واضح , كل ما كان جودة أعلانك أعلى كل ما كان اعلانك هيروح لشريحة أفضل من العملاء .

‭

طيب الاعلان خلاص دخل مراجعة واتقيم واتوافق عليه ايه بعد كده ,

بعد كده الذكاء الاصطناعى بينتقل للمجموعة الأعلانية , وبيبدأ يعمل تقسيمات تانيه بناء على اختياراتك , يعنى بعد ما حدد المجموعة الى هتكون فيها اعلانك بالنسبة للمجال ده بيبدأ يراجع اتسهدافاتك واوقات تشغل حملاتك الاعلانية وحد الدفع واماكن الاعلان وغيرها من الامور , وهنا الفيس بوك مش دورو يتصل على حضرتك ويقولك ( يا فندم اعلانك ممتاز وفى اعلى مجموعة لكن بناء على حد الدفع الى حضرتك محددو مش هيقدر يوصل لشريحة العملاء الى تناسب اعلانك ) لاء الفيس بوك لا بيعمل كده ولا ده دورو كل الحكايه مثلا ان ( اعلانك ممتاز جدا لدرجة انو واخد تقيم من 90 الى 100% يعنى المفروض يروح لأفضل شريحة عملاء ولكن حضرتك عامل حد الدفع مثلا الاقصى 0.30$ فى حين ان الشريحة الأفضل دى معدل الدفع فيها 0.70$ فـ بالتالى الفيس بوك بدون رجوع لحضرتك بيحط أعلانك فى المجموعة الى تناسب معدل الدفع 0.30$ ولنفترض انها المجموعة الى جودة اعلانها من 30 الى 40% ) يعنى برغم ان اعلانك ممتاز لكن بسبب اختياراتك الخاطئة نزلته فى مكانه أدنى .

‭

وعلى فكرة الفيس بوك هنا مش شرير وانو بيتصرف من دماغو بدون الرجوع لحضرتك بس انتا حضرتك مع كامل احترامى لشخصك مجرد حبة رمل بالنسبة للفيس بوك , الفيس بوك بيتعمل عليه يوميا مئات الملاااااااين من الاعلانات , فـ لو كل اعلان هيفضل يرجع للعملاء ويقولهم انتا عامل كده واصلك عامل كده فـ محتاج سيرفرات تقريبا بحجم المجموعة الشمسية كلها عشان تشيل البيانات دى او محتاج عدد فريق اد سكان كوكب الارض كلهم كـ دعم فنى وده طبعا مستحيل , وبرغم ذلك هوا عمل الى عليه وهتلاقى الكلام ده كلو موضح فى كورساتهم المدفوعة للتسويق الرقمى .

‭

طيب بعد تقيم المجموعة الاعلانية وتحديد الى يناسبك اكتر ايه بعد كده ؟

بعد كده بيروح الفيس على الحملة الاعلانية نفسها بعد ما بيكون حدد جودة اعلانك اولا ثم شرائح المزادات الى تناسبك ثانيا , بينتقل بعد كده لتقيم الحملة الاعلانية نفسها كـ هدف وكـ ميزانية , بالنسبة للهدف فـ بيستبعد الفيس بوك المزادات الى فيها احتمالية العملاء مش هيتفاعلو بالهدف الى حضرتك محددو , ولذلك بردو كبار الخبراء فى مجال التسويق الالكترونى بينصحو بأنشاء اكتر من حملة بأكتر من هدف مع بعض عشان تزيد فرصتك فى دخول مزادات اكتر , المهم بيتفضل معانا المزادات المناسبة لاعلانك بناء على تقيم اعلانك وتقيم مجموعتك الاعلانية , ثم بيروح للميزانية الى حضرتك محددها وبيبدأ فى فرز المزادات بناء على ميزانية حملتك الاعلانية سواء الاجمالية او اليومية , وبيدخل حضرتك فى المزادات المناسبة فقط لميزانيتك , يعنى مثلا بناء على تقيم اعلانك ومجموعتك الاعلانية متاح ليك انك تدخل فى مزاد × مثلا , ولكن مزاد اكس بيبدأ المزايده فيه من 2.50$ لكل ألف ظهور مثلا , وحضرتك محدد ان اجمالى ميزانيتك ف اليوم 10$ واحتمالية ظهور اعلانك الى حددها الفيس بوك متوسطها 10.000 شخص , فـ بيقسم الـ 10.000 شخص على 10$ بيكون المتاح عندو 1$ لـكل 1000 شخص وبالتالى بيستبعد حضرتك من المزاد ده لانك غير مؤهل للدخول فيه وبيبدأ يشوف مزادات أقل لشرائح اقل من العملاء , لحد ما بيجد بعض المزادات المناسبة لـ حملتك الاعلانية وبالتالى بيدخل حضرتك فيها وبيبدأ اعلانك فى العمل .

‭

طيب يعنى ايه مزادات وشرائح أقل ؟؟

زى ما الذكاء الاصناعى بيقيم اعلانك وبيديلك نسبة مئوية وبيحطك فى مجموعة معينه عشان يقدر يصنف المعلنين بسهولة , احنا كـ مستخدمين كلنا على الفيس بوك سواء معلنين او غير معلنين الفيس بوك كذلك مصنافنا على اننا شرائح بناء على كل شئ احنا عملناه على الفيس بوك من ساعة انشاء حسابنا , كل مكان وقف فيه الماوس بتاع حضرتك كل بوست وقفت وقرأتو كل صورة فتحتها او فيديو شغلتو كل شخص راسلك او رسلتو كل كلمة كتبتها سواء ف الخاص او فى تعليق او فى بوست كل تفاعل حضرتك عملته , كل شئ بمعنى الكلمة حرفيا الذكاء الاصطناعى بيسجلو ويراجعو , ودى عملية اسمها مراجعة البيانات عشان الفيس بوك يقدر يتنبئ بـ انتا احتمال هتعمل ايه لما يجيلك اعلان كذا , عشان كده مثلا تبقى قاعد بتكلم صاحبك على الخاص او فى الواتساب مثلا وبتقولو ( والله انا ي اخى نفسى اشترى فنلة نادى الاهلى الجديده ) , وسبحان الله تدخل بعدها بـ 10 دقائق على الفيس بوك تلاقى ظاهرلك كام اعلان لـ كام مكان بيبيعو فيه فنلات نادى الاهلى الجديده او الفنلات الرياضيه , وده طبعا مش سحر ده علم وتكنولوجيا , ف زى ما قولنا كلنا بنتقسم كـ شرائح وكل شريحه ليها مستوى اعلى من التانيه , وبيتوقع منها نتائج اعلى من التانية .

‭

طيب فهمنا الشرائح ايه بقى المزاد ده ؟؟

حضرتك لما بتعمل اعلان ممول مش بياخدو الفيس بوك كده من ايده ويحدفو للناس علطول الموضوع طبعا مش بالبساطه دى .

حضرتك مجرد شخص من الالاف الاشخاص الى بعملو اعلانات لنفس المجال فى نفس الوقت الى بنسميهم ( المنافسين ) , طيب ازاى الفيس بوك هيرسل الالاف الاعلانات دى لنفس الاشخاص المستهدفين بدون ما يظلم حد ؟

مهو انا كـ شخص مستحيل الفيس بوك يعرض عليا مثلا 10.000 اعلان يوميا لانى وقتها هقفل الفيس بوك من كتر الاعلانات ومش هفتحو تانى , وبالتالى هنا الفيس بوك بيعمل مزاد لكل شريحه من العملاء , وكل ما كان مستوى الشريحه أعلى كل ما كان سعر المزاد أغلى , يعنى مثلا بالنسبة للعقارات فـ شرائح الناس الى عايشه فى جاردين ستى او الزمالك غير شريحة الناس الى عايشه فى امبابه او طنطا وده مجرد مثال مبسط لكن الموضوع اعقد من كده بكتير , فـ هنفترض الشريحه × مثلا بيبدأ سعر الألف ظهور ليها من 0.50$ مثلا وحضرتك هنسميك ×1 وفيه 3 منافسين لحضرتك مثلا هنسميهم ( ×2 و ×3 و ×4 ) داخلين معاك نفس المزاد , نفترض حضرتك محدد الميزانية بتاعك 10$ فى اليوم وبناء على استهدافاتك فـ متوسط الظهور هيكون 10.000 شخص يعنى معدل الألف ظهور ليك 1$ , ثم عندنا ×2 محدد ميزانيته بـ 20$ ومتوسط الظهور ليه بناء على استهدافاته 5000 شخص بس فـ معدل الألف ظهور ليه هيكون 4$ , ثم عندنا ×3 محدد ميزانيته 30$ ومتوسط الظهور 10.000 شخص لكن محدد الحد الاقصى للانفاق 0.75$ فى الحالة دى معدل الألف ظهور ليه هيكون 3$ لكن هوا طالب من فيس بوك ميصرفش اكتر من 0.75$ لكل ألف ظهور , ثم عندنا ×4 محدد ميزانية 50$ ومتوسط الظهور 20.000 شخص يبقى ف الحالة دى معدل الظهور بتاعه هيكون 2.5$ لكل ألف ظهور .

‭

معلش الموضوع ممكن يكون معقد شوية للمتدئين بس بشوية تركيز هنلاقى ان الـ 4 اعلانات هيروحو لنفس الناس ولكن بترتيب مختلف , وتعالو نرتب بالارقام عشان يسهل علينا نحسبها .

×1 تكلفتة 1$ لكل ألف ظهور .

×2 تكلفتة 4$ لكل ألف ظهور .

×3 تكلفتة 0.75$ لكل ألف ظهور .

×4 تكلفتة 2.5$ لكل ألف ظهور .

فـ الاعلان الى هيظهر فى المرتبة الاولى هوا اعلان ×2 لانو أعلى سعر فيهم لمدة زمنية معينة ولحد ما الفيس بوك يتأكد ان العميل اتعرض عليه الأعلان وشافو , ثم بعدها هيروح للعميل أعلان ×4 وبردو لحد ما الفيس بوك يتأكد ان العميل شاف الاعلان , ثم هيروحلو اعلان ×1 , ثم اعلان ×3 .

‭

ده المزاد بختصار طبعا الموضوع اعمق من كده ومحتاج شرح اطول من كده بكتير لكن البوست بقى طويل كده فـ ده موضوع المزاد بختصار , وخدو بال حضرتكم انى هنا اتكلمت على 4 منافسين فقط ولكن ف الواقع كل مجال بيكون فيه الالاف المنافسين الى داخلين نفس المزاد على نفس شريحة العملاء بس كل الاعلانات بتمشى بالترتيب التالى زى ما شرحت فوق ولذلك فيه ناس كتيره جدا بتكون عندهم مثلا نسبة الظهور عالية جدا ولكن نسبة الوصول قليلة جدا وده لان بسبب ضعف ميزانية حضرتك اعلانك راح للشريحه اينعم ولكن بسبب قلة ترتيب اعلانك فـ العملاء ملحقوش يشوفوه فـ بكده الفيس بوك عمل الى عليه واعلانك راح للعملاء لكن للاسف محصلش وصول لانهم ملحقوش يشوفوه .

‭

طيب دلوقتى لو فيه اتنين منافسين عاملين نفس الميزانية بظبط ترتيب مين فيهم بيكون اعلى من التانى ؟

فى الحالة دى بناء على تقيم مجموعتك الاعلانية وتقيم اعلانك بيحدد مين فيهم احق يكون ترتيبة اعلى من التانى زى ما قولت فوق تقيم الاعلان بيكون عن طريق الالاف المقومات الى صعب نشرحها كلها لذلك من الصعب جدا جدا جدا ان يكون فيه اعلانين واخدين نفس التقيم لازم يكون اعلان فيهم افضل من التانى بشكل او بأخر .

‭

طيب بعد ما عرفنا كل ده ايه بقى حكاية دعم فيس بوك وليه قولت ان جزء من الكلام المنتشر حقيقى ؟

فى الحقيقة فعلا فيه دعم للفيس بوك واسمه ( تحسين من أجل الظهور ) بس الخطأ فى الموضوع انو ملوش علاقة بالحسابات الجديده او القديمه ليه علاقة بـ ip و id المعلن نفسو وبختصار برده هشرح النقطه دى سريعا .

كل شخص فينا ليه عنوان برتوكول مميز اسمه ip وحسابه ليه عنوان id فريد , ف بعيدا عن الحساب جديد او قديم لما الفيس بوك بيلاقيك بتعمل اعلان ممول لمجال ما اول مرة او بتستهدف شريحه ما لاول مرة بيدعم اعلانك عن طريق انو بيحققلك نتائج أفضل من الطبيعى كـ دعم منه وتشجيع للاستمرار فى الاعلانات , ولكن بعد تحديدا مرور 72 ساعه الدعم ده بينتهى , وبيمشى اعلانك بالشكل وبالنتائج الطبيعيه ليه , عشان كده ديما بننصح العملاء انك مش تنبهر بكلام الاشخاص المحتالين الى بيقولك انا هجيبلك نتائج عالية اكتر من الطبيعى لان ده بيكون لفترة محدوده جدا .

‭

هيجى عميل او مسوق ذكى يحب يبقى اذكى من الذكاء الصناعى نفسه ويقول طيب منا استفيد من العرض ده بأكبر شكل ممكن عن طريق ان انى اعمل الاعلان لمدة يومين بس كل يومين من حساب جديد , وساعتها هقول لحضرتك ( مكنش حد غلب هههههه ) ف الحقيقة الفيس بوك بيديرو اشخاص من اعظم العقول فى العالم ده غير الذكاء الاصطناعى نفسه فـ من الصعب جدا علينا نتخطى معدلات الذكاء دى كلها , لان ببساطه عشان تعمل كده حضرتك محتاج التالى :

1_ هتعمل حساب جديد من جهاز سواء كمبيوتر او لابتوب او موبايل جديد كل يومين .

2_ هتنشئ صفحة جديده كل يومين .

3_ هتعمل اعلان جديد على الصفحه الجديده كل يومين بصور ومحتوى مختلف عن الى قبلو .

وزى ما حضرتكم شايفين حتى لو فيه شخص عنيد اصر انو يعمل كده فـ هيبقى ف الحالة دى بيخسر مش بيكسب وهتكون خسايرو كـ وقت وجهد ومال اكبر بكتير جدا جدا من انو يمشى بشكل طبيعى وشرعى فى الاعلانات .

‭

فى النهايه احنا وضحنا ازاى وليه فيس بوك بتدعم الحسابات الجديده وعرفنا كمان ازاى بيتعمل الاعلان وخطواته المخفيه وعرفنا كمان ان موضوع ان فى الاول النتائج كويسه وكل ما تزود ميزانيتك النتائج بتبقى اوحش ده كلام مش صحيح كلام غلط تماما وملوش علاقة بالواقع , وطبعا مرضتش ازود فى طول البوست بأنى اشرح ان مفيش حاجه اسمها سعر الرساله غالى ولا رخيص لان اصلا الفيس بوك مش بيحاسب على سعر الرساله ولا الفيس بوك ولا المتخصص الى بيعمل الاعلان ليهم علاقة ولا يقدرو يتحكم ف سعر الرساله مش هكتر فى البوست لانى شرحت ده فى بوستات قديمه ممكن حضرتكم تدورو عليها او على صفحتى .

‭

انا عارف ان البوست طويل جدا وفى الغالب مش هيتقرأ كله ولكن حاولت بقدر الامكان افيد حضرتكم وأسأل الله تعالى ( اللهم علمنا ما ينفعنا وأنفعنا بما علمتنا ) وبالتوفيق للجميع .

‭

Eng Mohamed Ali

إستشارى التسويق الرقمى والتجارة الألكترونية