.

السؤال الثانى بالنسبة لصاحب العمل مين المسوق او الشركة الى اقدر اشتغل معاها ؟

وقبل ما نجاوب على السؤال ده تعالو نصلح بعض المفاهيم عشان تكون الامور مريحه نفسيا .

اولا مفيش حاجه اسمها ( التسويق بالعمولة ) دى مجرد بدعه مش اكتر المصطلح المناسب اكتر اسمه ( البيع الفردى ) او ( البيع المباشر ) ودى وظيفة تختلف عن مجال التسويق نفسه وبتتطلب بعض المهارات الى من الصعب توافرها فى شخص شغال فى مجال التسويق ودى حاجه عشان اشرحها محتاجه حلقة فيديو لوحدها , فـ لما يكون حضرتك عندك منتج وعاوز تحل المعادلة الصعبه الى بقالها اكتر من ( 200 سنه ) بدون حل من ايام النهضه الصناعيه , انك بختصار عاوز حد يديلك 100 جنيه عشان انتا تديلو 10 جنيه , فـ حتى لو فيه حد لظروف ما قبل ب ده فـ هوا اسمه ( البيع الفردى او البيع المباشر ) ملوش علاقة بالتسويق ومن فضلك متقولش عليه تسويق , لان مجال التسويق الالكترونى بعيدا عن انه مجال مختلف تماما الا انه كمان اكثر تعقيدا بمراحل كبيرة اوى من ذلك , ومعنى كده لما يجى حد يقولك انا شغال ( تسويق بالعمولة ) فـ تلقائيا وبدون اى احتمال للخطأ تعرف ان ده ياما شخص نصاب ياما مش فاهم اى حاجه فى كل حاجه .

.

ثانيا مفيش حاجه اسمها باقات وتعالى نعملك اعلانك ب 500 جنيه ونعملك تسويق ب 5000 جنيه والكلام ده , لان بديهيا هما جابو الارقام دى منين وبناء على ايه , فى مجال التسويق الاحترافى احنا بنبنى ديما شغلنا على احصائيات وتقرير وارقام مش بالحب والتخمين فـ معنى ذلك برده لما يجى حد يقولك انا شغال ( انا هعملك اعلان او تسويق ب كذا ) فـ تلقائيا وبدون اى احتمال للخطأ تعرف ان ده ياما شخص نصاب ياما مش فاهم اى حاجه فى كل حاجه .

.

ثالثا التسويق قسم وليس شخص , بمعنى ان مفيش حاجه اسمها تروح تكلم شخص وتقولى من فضلك عاوزك تمسكلى تسويق شركتى او مشروعى , وده لان زى ما قولنا مجال التسويق الالكترونى اكبر واعقد بكتير جدا , عبارة عن مجموعة من الوظائف المختلف مثل ( مدير التسويق الى بيعمل الخطط والاستراتيجيات والحملات الاعلانية , الميديا باير الى بينفذ الخطط والاسترايتيجات دى , وفيه الداتا انالتيس الى بيكون مسؤل عن تحاليل الاحصائيات والتقارير ومتابعة معدل النمو والاستهداف الصحيح , وفيه مصميمين الجرافيك ومصممين المنتاج والموشين جرافك والتعليقات الصوتيه والمسوقين اليدوين والبرامج والادوات المستخدمه ) طبعا انا اتكلمت عن وظيفة كل شخص بشكل سطحى ومختصر جدا عشان بس اوصل لحضرتك ان كل دول على بعضهم ومع بعضهم كده اسمهم ( تسويق الكترونى ) فـ لما حضرتك تقول انا عاوز اعمل تسويق الكترونى فـ انتا محتاج لكل دول ان زاد قليلا او قل قليلا على حسب مجالك , لكن لما تروح لشخص واحد فقط مينفعش تقوله انا عاوزك تمسكلى التسويق لا انتا بتحدد حاجه معينه فقط يعملها لان مهما كانت مهارته او خبرته هوا بشر محكوم بجسد ليه قدرات معينه لا وقته ولا مجهوده هيسمحاله يقوم بأكثر من وظيفه مختلفه فى وقت واحد وحتى لو حد حاول يعمل كده فـ هتكون النتئجه سيئه جدا فى الوظيفتين فما بالك بأكثر من وظيفتين , وبرده ده بيفتح الباب ادام المحاتلين لمحاولة خداعك بأنهم يصورولك انهم يقدرو يعملو كده مع العلم انك لو فكرت لوحدك براحه شوية هتلاقيه امر غير منطقى تماما .

.

رابعا قبل ما تدخل مجال التسويق الالكترونى نفسه لازم تكون حضرتك محدد الهدف الى محتاج توصله ومحدد الميزانيه المتاحه لحضرتك , ولازم يكون فيه توازن بين الميزانية والهدف كل ما الميزانية زادت زاد معاها الهدف وكل ما الميزانية قلت قل معاها الهدف , وده لان حضرتك بتتعامل مع بشر مش مجموعة من ( السحرة ) , يعنى مينفعش يا فندم مثلا تكون فاتح شركة جديده فى المقاولات وتروح لشخص او شركة فى التسويق تقولهم انا عاوز فى خلال سنه واحده اكون بنافس معمار المرشدى وطلعت مصطفى ولما يسألو حضرتك على الميزانية تقولهم انا اخرى ادفع 10 الالاف جنيه فى الشهر , الى هوا ? what the hell , يعنى حضرتك منطقيا الى بتقولة غير منطقى بالمرة , وخد بالك لو كانت الحاجه سهله كان الكل عملها ده قانون ثابت احتفظ بيه , فـ عشان تفيد نفسك وتفيد شغلك ومتضيعش وقتك لازم تكون شخص منطقى حتى لو معندكش خبرة عن المجال لازم تفكر بعقلك ويكون ديما هدفك مناسب لميزانيتك , والا هتكون حضرتك زى ما قولنا فوق بيئة خصبة جدا للمحتالين والنصابين .

.

خامسا ودى النقطه الى بعتبرها أهم نقطه فى الموضوع , التسويق مش بيبيع ي فندم , التسويق قسم والمبيعات قسم مختلف , دى وظيفة ودى وظيفة مختلفة , التسويق مجرد عامل مساعد على البيع زيه زى مئات العوامل الاخرى , فـ لما تيجى حضرتك تتعامل مع شركة او فرد لمده معينه وتلاقى نفسك ( بتخسر ) زى ما بنشوف فى كتير من بوستات العملاء , ف البداية لازم تراجع التسويق ده شئ اكيد انا مش بقول كله حلو لاء فيه شركات واشخاص كتير كدابين ونصابين ومحتالين وعديمى الخبرة , ولكن خد بالك انا بقولك ( تراااااجع ) مش ترمى بكامل اللوم على التسويق , وعشان ادى لحضرتك مثال منطقى , نفترض دلوقتى حضرتك اشتريت قلم ثمنه 2 جنيه , وقولتلى سوقلى القلم ده واعملى اعلان ممول بميزانية ضخمه جدا بس خلى ثمن القلم ده 50 الف جنيه , ساعتها حتى لو كان التسويق فوق الممتاز والحملة الاعلانية فوق الممتازه النتيجه ان حضرتك مش هتبيع ولا قلم , وده لان الخلل مش فى التسويق ولا الاعلانات الممولة الخلل فى نقطه مختلفه وده ديما الى العميل بيزعل منه , خصوصا لو اتكلمنا معاه بصراحه وامانه وقولنالو انتا ي فندم ف وضعك الحالى لا وجود لك بالنسبة للسوق او حجمك صغير جدا جدا , او لا تقارن بالنسبة للمنافسين , العملاء بيزعلو جدا من الكلام ده وتقريبا عاوزين حد يخدعهم او ينافقهم او يجاملهم , فـ فى المثال الى قولته لحضرتك ده كان الخلل فى سعر المنتج , احيانا بيكون الخلل فى نوع المنتج او خامة المنتج او سعر التوصيل او مدة او طريقة التوصيل او حتى كيانك نفسو انك كيان غير معروف وغير موثوق فيه ……… ألخ , كل دى عوامل بتأثر على انك هتبيع ولا لاء وهتبيع اد ايه والتسويق الالكترونى والاعلانات الممولة مجرد عامل من العوامل دى مش اكتر .

.

سادسا مفيش حاجه اسمها حد نصاب وضحك عليك ومحققلكش نتائج , لان محدش هينصب عليك الا لو حضرتك سمحتله ينصب عليك , بمعنى ان حضرتك لما تلاقى بوست زى ده وتقول لاء انا مليش فى التعقيد ده كلو انا لسه هقرأ وافكر فى كل ده انا هروح للى هناك ده بيقولى هيعملى اعلان ب 500 جنيه وهيخلينى ابيع كتير , فى الحالة دى هوا مش بس نصاب ي فندم ولكن حضرتك كمان ( ……. ) طبعا مع كامل الاحترام لكم جميعا ولكن ده وصف للموقف وليس لحضرتكم , حضرتك مهما كنت فاكر نفسك شاطر لو ابتعدت عن العقل والمنطق فـ مش هيتبقى لحضرتك غير المستحيل , وانا طبعا مقصدش بكلامى ده انى حلو والباقى وحش او انى انا والى زيى حلوين والباقى نصابين ولكن الى اقصدو ان حضرتك لما تستسهل وتسترخص منتظر تكون ايه النتيجه .

.

فى النهاية بعد تعديل المصطلحات دى هقول لحضرتكم ازاى بمنتهى البساطه تفرق بين الشخص المتخصص بالفعل والشخص المحتال .

وده عن طريق ان حضرتك تدور ورا الشخص او الشركة نفسها , هل ليهم اسم ولا لاء ؟ , هل ليهم سمعه ولا لاء ؟ , مستواهم خبراتهم الناس الى اتعاملو معاهم قالو ايه عنهم وغيرها من الأمور .

وده لان بمعادلة بسيطه جدا ( اى شخص او شركة ليهم اسم وشهره وسمعه كويسه مستحيل يخاطر بأسمه وسمعته وشهرته لمجرد انو ينصب على حضرتك حتى لو هيكسب الالاف لانو هيبقى بيخسر فى المقابل ملاين )

لكن حضرتك تروح تتعامل من شخص بيدعى انه خبير وهوا لا لسه اسم ولا حد يعرفو ولا حد عمرو سمع عنه او شركة بتقول انها شركة لمجرد ان عندها صفحه على الفيس بوك او حتى مقر مأجرينو بالساعه فـ ده فى حد ذاته مخاطرة كبيرة جدا .

خدو بالكم انا بقول مخاطرة مبقولش اكيد هما وحشين لاء فيهم ناس كتير كويسين سواء اشخاص او شركات لسه مبتدئين فـ بالتالى لسه معندهمش اسم او سمعه او شهره , ولكن تعامل معاهم بحظر لان الشخص المجهول معندوش شئ يخسرة ف بالتالى مش هيفرق معاه ابدا ينصب عليك او لاء لان ببساطه ايه الى هيأذيه ف الموضوع , هتطلع حضرتك تقول الشخص الفلانى نصب عليا عادى هيعمل اكونت تانى بأسم تانى ويكمل نصب على الناس , هتطلع تقول الشركة الفلانية نصبت عليا عادى هيعملو صفحه جديده بأسم تانى ويكلمو نصب على الناس .

وبكرر تانى انا هنا مش بقول كلهم وحشين ولكن بقول كن حذر فى التعامل مع الاشخاص والشركات المجهولين الى ملهمش هوية ولا حد يعرفهم .

.

انا عارف ان البوست طويل جدا لكن أتمنى من الله انى اكون بيه قدرت افيد اى شخص ان شاء الله .. وبالتوفيق ليكم جميعا .

.

Eng Mohamed Ali

إستشارى التسويق الرقمى والتجارة الألكترونية