النمو

النهاردة جاى اكلمكم عن ” النمو ” واجاوب على اسأله كتيرة مهمه جدا عشان فعلا تنجح فى عملك ارجو الاعتذار على الأطالة وارجو التركيز فى التفاصيل .

النمو

فى الغالب الا من رحم ربى لما عميل بيبدأ البيزنس الخاص بيه بيكون بشكل عشوائى بدون دراسة او خطة , وفى الغالب بعدها وبسبب قلة معرفتة فى مجال التسويق الالكترونى , بيتجه الى احد الخبراء او شركات التسويق وبيعاملو كأنه ساحر , كانه الشخص الى هيضرب بعصاه تقوم انتا تحقق مبيعات ومكسب , مع ان لو فكرنا بالعقل براحه وبشكل منطقى هنلاقى ده مستحيل , لان اى شخص او شركة لو عندها القدرة دى مكنش هيحتاج يشتغل مع حضرتك او مع غيرك كان هيعمل السحر الخارق ده لمصلحته الشخصية .

بيبدأ العميل يروح لخبير التسويق او شركة التسويق ولما يسألوه عن الهدف يقولهم ” المبيعات ” ولكن ي جماعة الخير ” المبيعات ” ليست هدف ” المبيعات ” ( نتيجة ) , الهدف الى بيسألوك عليه هوا هدفك من التسويق او الاعلانات الممولة الى تساعدك وتديك وسيلة تقدر تحقق بيها مبيعات لكن مش بتوفرلك هيا المبيعات , لذلك وفى هذا المجال تحديدا اى شخص اشوفه بيوعد حد بالمبيعات بدون ما اعرفه ولا اسأل حتى بعتبره ” نصاب ” مع كامل احترامى للجميع .

خبير التسويق او شركة التسويق مجرد وسيط دورة يوصل حضرتك كـ كل للعميل الى ممكن يهتم ب مجالك فقط لا غير , زى ما الفيس بوك او جوجل او اى منصه ليست سوى وسيط دورهم يوصلو ” أعلانك ” للعميل الى ممكن يهتم بيه فقط لا غير , ونركز جدا ياريت فى كلمة ” ممكن ” لان دى امور متغيرة مش ثابته عشان اى حد او جهة ما تضمنها .

وبختصار شديد قسم التسويق الالكترونى بالكامل فى اى عمل سواء كبير او صغير مش اكتر من ترس من مجموعة تروس بيدوك الادوات الازمه عشان تقدر تبيع , زيه زى قسم المبيعات وقسم المحاسبة وقسم الانتاج ….. ألخ , فـ نوع من الظلم لنفسك كـ عميل قبل ما يكون للجهة الى بتتعامل معاها لما تمسك ترس واحد فقط وتحملو نتائج جميع التروس بالكامل , وده بينتج عنه ديما وبدون استثناء فشل .

طيب انا كـ عميل دلوقتى فهمت كلامك ده كله او مفهمتوش مش مهم المهم انى اتعاملت مع خبير تسويق او شركة تسويق عملولى حملة اعلانية بـ 1000 دولار مثلا والمبيعات الى حققتها اصلا متغطيش المبلغ ده مش كده انا بخسر ؟؟

فى الحقيقة لو حضرتك بتفكر كده يبقى فعلا بتخسر بس مش بسبب الى حضرتك قولته ولكن بسبب تفكيرك البعيد عن اساليب الادارة الناجحه ونيجى هنا لاهم نقطه فى كلامنا وهيا ” النمو “

النمو اعزائى هوا مستوى ارتفاع او انخفاض المجمل العام لعملك , وبالبلدى كده يعنى الموضوع مش انك بتكسب دلوقتى ولا لاء الموضوع انك عملك بيكبر وبينمو ولا لاء , وطبعا مش عاوز ادى الالاف الامثلة على شركات عالمية خارقة النهارده بالنسبالنا قعدت سنين بدون تحقيق ربح مادى زى ( امازون _ اوبر _ وفيس بوك نفسه ) وغيرهم كتير وده عشان مش يكون الكلام كتير جدا ولكن الى حابب يعرف ويتعلم ويفهم يدور فى جوجل على الشركات دى بدأت ازاى وهوا هيفهم جدا .

الصورة الى تحت دى حضرتكم عاوزكم تركزو فيها اوى صورة بسيطه مش معقدة ممكن بتشرح فكرة النمو , لو ركزنا فيها هنلاقى العمل ابتدى وفى بداية العمل ديما بيكون عندنا حماس خارق وده الى بيخلينا عن طريق الاعلانات الممولة او غيرها نحقق نمو سريع وكبير اوى زى مهو واضح من الفترة ما بين يوم 12 ويوم 15 تقريبا , وبعدها بتيجى الفترة الى بعتبرها اهم فترة فى تاريخ اى عمل بلا استثناء , الفترة الى بنلاقى فيها نمو كبير اه لكن بدون دخل مادى او مكسب بالفلوس , وده الى بيموت الحماس جوانا وبيخلينا نوقف الى بنعمله , وبينتج عن ده زى ما حضرتكم شايفين ف الشريط موت كامل للنمو زى مهو واضح من فترة ما بين يوم 15 لـ يوم 19 تقريبا , دى بقى الفترة الى بتحدد هل الشخص ده عنده قوة ارادة وعنده ثقة فى نفسه وفى شغلو وفى ربنا ولا لاء .

لو كانت الأجابة لاء , بتكون النتيجه فشل تام وموت كامل للمشروع زى ما بنشوف فى الالاف المشاريع الصغيرة يوميا ومش بيكون كسب اى حاجه غير انه ضيع وقت وجهد وفلوس على الارض .

ولو كانت الأجابة ايوه فـ بينتج عنه فى الغالب زى ما حضرتكم شايفين ف الصورة ان معدل النمو بيبدأ يرتفع بشكل تدريجى وببطئ على حسب امكانيات العميل , وسواء بيرتفع ببطئ او بسرعه المهم انه بيرتفع بشكل دائم وتدريجى زى مهو واضح فى الصورة , وده معناه انو ماشى صح , يمكن مش بيحقق مكسب مادى مؤقتآ , لكن الاكيد انو لو استمر على المستوى ده من النمو انو فيما بعد مش بس هيحقق دخل مادى يعوض كل الى فات , لاء ده كمان هيحقق ربح مادى بشكل متزايد ومستمر زى ما نسبة النمو عنده متزايدة ومستمرة .

فى نهاية كلامى حابب اقول لحضرتكم 4 نصائح عشان مش تضيعو وقتكم وجهدكم وفلوسكم على الفاضى .

النصيحة الأولى : مجال التسويق الالكترونى مجال بيحتاج الى امكانيات مادية فـ لو من البداية هتكون ادها ادخل فيه اما لو مش ادها يبقى بلاش ترمى فلوس حتى لو بسيطه على الأرض بدون نتيجة .

النصيحة التانية : التسويق الالكترونى كله مجرد ترس فى الآلة مينفعش حضرتك تحملو مسؤلية الآلة كلها , ولا ينفع تعاملو على انه ساحر .

النصيحة التالته : لما حضرتك تلاقى كلامى غير منطقى ( زى الى بيوعدو بمبيعات والى يقولك باقات تسويق والى يقولك هحققلك اعلى نتائج فى الاعلان ) وتختار تشتغل معاهم يبقى حضرتك ( بتشترى العتبة الخضرا ) حضرتك الى عاوز ينضحك عليك , هنا مفيش شرير نصب عليك , انتا الى اخترت ده بأرادتك .

النصيحة الرابعة : لو بدأت عملك ونظرك على الربح المادى السريع اعرف انك هتفشل ودى مفهاش لو على اقل التاريخ بيقولنا كده من ملاين التجارب , اما لو كان عندك صبر وحكمه وكان عينك وهدفك على النمو اعرف انك فى الغالب هتنجح بأذن الله .

أتمنى اكون قدرت افيد حضرتكم بشئ , وبعتذر على الأطاله .