ساندوتش_طعمية

الفنان علي الشريف “دياب” في فيلم الأرض وهو بياكل الطعمية قال ياما انتو ممتعين نفسكو يا أهل البندر ، لو انت من أطفال ريف زمان اكيد عارف شعور دياب ، كان مستعد يضحي بفطيرة مشلتته ومعاها قطعتين جبنة قديمة ثمنهم النهارده 200 جنيه عشان ساندوتش طعمية ب 5 جنيه .. لو خيرت طفل بين قطعة شيكولاته ب 20 جنيه وجاكيت ب 1000 جنيه هيختار الشيكولاته ، فيه فرق بين ثمن الاشياء وقيمة الاشياء ، واحد صاحبي موظف وعنده حته ارض كردون مباني والوظيفة مش كفاية ، زوجته طلبت الطلاق من ضيق الحال وأولاده مش عارفين يعيشوا بمرتب الوظيفة ، قلت له بيع الأرض ورتب حياتك و حياة اولادك قال لأ أنا سايب الأرض دي لهم في المستقبل ، قلت له هتفيد بايه بعدين وهما حاليا مش لاقيين ياكلوا ، الأرض لها ثمن لكن لمة اسرتك حواليك لها قيمة .. ايه الفرق بين ثمن الاشياء وقيمة الاشياء ؟

لو ابنك بقي راجل ومش شايفك أعظم اب في الدنيا يبقي ملكش اولاد وانت بالنسبة له مجرد محفظة فلوس يعني شىء له سعر مش قيمة ، لو زوجتك عاشت معاك سنين ومش شايفاك رقم واحد في حياتها يبقي انت single وانت بالنسبة لها قايمة ومؤخر وشوية عفش مش انسان له قيمة ، بلاش تخليهم يستعجلوا موتك عشان يورثوك لكن خليهم يتمنوا وجودك عشان يعيشوا معاك ، اي شئ له ثمن هو رخيص والثراء هو القدرة على امتلاك القيمة ، امتلاك ما لا يُشتري ..