ادوار المسوقين
السلام عليكم ورحمة الله 
من شوية شوفت بوست مهم جدا وعجبنى وحبيت ارد عليه الى صورته تحت دى , ولكن ما على كتبت الرد ده كله لقيت البوست اتمسح معرفش ليه ولكن بسبب اهميته حبيت انى اكمل الرد عليه برده لعل وعسى اقدر افيد شخص .
ادوار المسوقين
اولا انا بحيك على البوست الجميل ده .
.
ثانيا اتمنى تقبل الانتقاد لان من الانتقاد تعم المنفعه وليس من المجاملات .
.
انا اتفق معاك بنسبة 80% فى اول فقرة فى كلامك بستثناء ” غير لو كان عنده خبره كبيره ” وده لان مهما بلغت خبرته حتى وان وصلت لعنان السماء فـ لا طاقته العقلية ولا الجسدية هتسمحله يعمل كل حاجه .
.
تانى فقرة فى كلامك اختلف معك تماما لانك وضحت ان مشكلتك فـ انو ( فردى ) لكن هوا اساسا مفيش مسوق الكترونى يعرف اصلا حاجه عن التصميمات او المونتاج الا بشكل سطحى دى وظيفة مختلفة تماما الا لو كنت تقصد بكلمة مسؤل عنهم بأنه بيشرف على تنفيذهم مش هوا الى بينفذهم .
.
تالت فقرة فى كلامك اتفق معاك بنسبة 50% وده لان مفيش حتى مسوق الكترونى مبتدئ بس بالفعل ضيع سنين من عمرة فى الدراسة الحقيقية والتجارب واخد الخبرة الحقيقية هيرضى بـ راتب 3000 جنيه وهنا انا بتكلم عن المسوق المبتدئ وليس المتخصص او المحترف , ولكن اختلف فـ انك ممكن توضح ان حتى المسوق المحترف ممكن يقبل بالمبالغ دى عادى مقابل اعمال محدوده تتناسب مع المبالغ دى كـ فرى لانس , فـ لما واحد يوافق انو يعملك حملة اعلانية تجريبية لمدة اسبوع ويوافق انو ياخد 1000 جنيه بس ده مش معناه انها حاجه تقل من شأنه بالعكس هوا اخد المقابل المناسب لجزء من العمل مناسب .
.
نيجى بقى لأهم نقطه الى فيها سامحنى لعبكة كتيرة جدا , مع انى مقدرش انكر اجتهادك من الوصف والتقسيم ولكن كان الافضل المشورة قبل ما تنزل الكلام ده للناس , وانا للاسف مش هقدر اتكلم على كل فقرة زى ما عملت فوق لان اساسا التصنيف نفسه من البداية خاطئ تماما , وانا برده هجتهد واحاول اقول الى شايفو صح بالنسبالى ومستعد لاى انتقاد من اى شخص اكثر خبرة وان شاء الله كلنا نتعلم من بعض :
.
1_ عشان صاحب عمل يستفيد من كلامنا لازم ف البداية نعرفه ايه هيا الاساسيات ثم ايه هيا الفرعيات ثم التقسيمات ودول كلهم الى اسمهم التصنيف العام لمهنه معينة :
فـ اولا الاساسيات هيا ان لازم الناس تفهم ان ( التسويق الالكترونى قسم وليس شخص ) وياريت نحط تحت الجملة دى مليون خط لان هيا الى فيها ملخص الكلام الكتير جدا بتاعى ده وبتاع اى حد حرفيا ( التسويق الالكترونى قسم وليس شخص ) قسم متكامل فيه ادوار معينة كل شخص وليه دورة ومحدش هيقدر يقوم بأكترر من دور عقليا وجسديا حتى لو كان يمتلك الخبرة الكافية , ولو حد حاول يعمل كده فـ هوا بيوزع الحد الادنى من المجهود لانجاز عمل ما على اكثر من عمل وبالتالى النتيجه هتكون محسومه الفشل الزريع .
.
2_ الفرعيات هيا الأعمال الخارجه عن قسم التسويق والى بيحتاجها قسم التسويق لنفيذ اعماله , او بالبلدى يعنى وظائف تانيه ملهاش اصلا اى علاقة بمجال التسويق الالكترونى ولكن قسم التسويق الالكترونى فى ( بعض الاوقات ) بيحتاجها فـ بيطلب منهم بعض الاعمال المعينة كـ استعانة فرعيه فقط بالوظيفة دى وليست جزء من القسم نفسه ودى وظايف زى :
تصميمات الجرافيك
الموشن جرافيك
الويف
المونتاج
المبيعات او السيلز
الاسبونسر
الطباعة
المبرمجين
وفيه وظائف تانيه كمان بس عشان هتكون مختلفة من عمل لاخر ولكن دى الوظائف الشائعه .
.
3_ التقسيمات وهيا الى بتوضحلنا وظائف الاشخاص داخل قسم التسويق ويقدرو يعملو ايه .
ودول ليهم تقسيمات اساسيه وتقسيمات فرعيه برده
التقسيمات الاساسيه 3 مركز محدده ومحورية الى هما :
1. مدير قسم التسويق الالكترونى وده بيكون صاحب اعلى مستوى من الخبرة والتجربة والمعرفة وبيكون هوا المسؤل عن كل الامور التخطيطية وادارة القسم بالكامل .
2. المتخصصين ودول بيكون مجموعه من الاشخاص درسو التسويق واخده خبرة كافية منه ولكن كل فرد فيهم تخصص فى جانب من جوانب التسويق عشان يكون متمكن منه تماما ومبدع فيه ودول بيكون منهم :
_ الشخص الى بيكون مسؤل عن ادارة الموقع الالكترونى او المتجر الالكترونى وده بيكون اسمه بالعربى كده متخصص الأرشفة وهوا الى بينزل المحتوى وهوا الى بيشتغل على ارشفة الموقع وتحسين محركات البحث السيو وكل ما يخص الموقع او المتجر الالكترونى بعكس كلام البعض فـ الوظائف المبسطه الى زى دى مينفعش يقوم بيها اكتر من شخص لانها بتعتمد على استراتيجية واحده ولازم الشخص نفسه يكون استراتيجيته فى العمل واحده لان لو فيه شخصين مهما كتبو الاستراتيجية وحفظوها هيكون فيه فروقات فى تطبيها هتنعكس على هيكلية الموقع او المتجر نفسه .
_ الشخص الى بيكون مسؤل عن ادارة منصات التواصل الاجتماعى الى اسمو بالعربية متخصص السوشيال ميديا ( مع العلم ان سوشيال ميديا كلمة انجليزية بس متعارف عليه بالاسم ده ) المهم الشخص ده زى الى فوقه كده بيكون مسؤل عن كل ما يخص منصات التواصل الاجتماعى بينزل محتواها وبيتابع ارشفتها ” للى معندوش فكرة البوستات على منصات التواصل الاجتماعى ليها ارشفة برده ” وكذلك الوظيفه دى مبسطة بالتالى مينفعش يقوم بيها اكتر من شخص الا فى حالات نادرة جدا لما تكون شركة مالتى انترناشونال كبيرة جدا فـ بالتالى بتحتاج متخصص لكل منصه على حدى .
_المحللين ودول فى الغالب مش بيحتاجهم الا الشركات الكبرى برده وبيكونو اشخاص بخبرة كبيرة تخصصو فقط فى جانب تحليل البيانات ويمكن دى حاجه غريبة على مسامع المواطن المصرى او العربى عموما ومش شايفين للشخص ده اهمية كبيرة بس احب اقولكم ان الشخص ده يعتبر من اهم الشخصيات فى المنظومه ف الخارج والى تقريبا 80% من الشغل بيكون قائم على شغله ه
وا .
.
3_ المسوقين المبتدئين وهنا انا مش بتكلم عن مجموعة من الهواه صحيو من النوم قالو هنشتغل مسوقين ولا لمجرد انهم عندهم فيس بوك قالو على نفسهم مسوقين لاء انا بتكلم عن اشخاص دراسو فعلا واخدو كورسات ودورات تدريبية فى مجال التسويق ولكن هما لسه بيكونو فى بداية حياتهم فى المجال ده ودول بيكونو العامل البشرى الى بنتعامل على اساسه مع اهدافنا وطبعا كل ادوارهم حاليا فيه برامج وسكربتات واضافات بتقوم بيها تقريبا ولكن يظل وجود العامل البشرى مؤثر بشكل كبير فى العمل , ودول فى الجزء بتاعهم برده ليهم تخصصات على حسب حجم الشركة والعمل المطلوب فـ بيكون فيه المتخصص فى المشاركات اليدوية وفيه المتخصص فى كتابة المحتوى الاعلانى وفيه المتخصص فى الرد على تعليقات العملاء او على الرسايل ( وده بيكون غير الكول سنتر الى بيرد على اتصالات العملاء ) .
.
ولحد هنا انتا معاك كده الوصفة او مقادير انشاء قسم للتسويق الالكترونى فى شركة او مجال عملك , ولكن هيجى بعض الاشخاص الى يسألونى اسأله ذكية اوى :
.
1_ السؤال الاول : ولما هوا ده قسم التسويق ليه بنشوف اشخاص تانيه بمسميات تانيه ؟
الاجابه : ان دى المقادير الاساسيه الى بتزيد او بتقل على حسب احتياج العمل يعنى شركة متوسطه مظنش انها هتحتاج اكتر من العدد ده طيب الشركة دى ربنا كرمها وبقت شركة انترناشونال فـ بالتالى الشغل هيكون اتقل واصعب وبالتالى هيحتاجو يزودو فريق العمل عن طريق تقسيم الاعمال على عدد اكبر بمسميات اكتر زى ما قولنا مثلا فى الكيان المتوسط انتا بتحتاج متخصص سوشيال ميديا واحد يدير ليك صفحة الفيس وحساب انستجرام وتويتر وهكذا طيب الموضوع زاد اوى اوى فـ بالتالى بتحتاج تخلى حد واحد بس على الفيس وبيكون متخصص ادارة الفيس بوك مثلا وواحد تانى متخصص ادارة تويتر مثلا وهكذا فى كل حاجه عموما الا فى الادارة مينفعش ابدا يكون الادارة فى ايد اكثر من شخص واحد وبيطلع بقى مسميات زى تيم ليدر وسوبر فايزر وهكذا بسبب نفس النقطه .
.
2_ السؤال الثانى : طيب الاعلانات انتا متكلمتش عنها مين بيعملها وليه ؟
الاجابة : فى الحقيقة موضوع الاعلانات موضوع حساس وملوش قاعده ثابته وده لان الاعلانات هيا الجزء الاهم بلا استثناء فى مجال التسويق الالكترونى والجزء صاحب اغلب التكاليف وهنا الشركات بيكون ليها اكتر من رأى ” اول رأى بيقول ان الاعلانات الى يقوم بيها هوا مدير التسويق نفسه لان الأكثر خبرة والأكثر امانه والأكثر شمولا بالعمل _ والرأى التانى بيقول ان كل مختص يعمل اعلاناتو فى مجالو الى ماسك الموقع هوا نفسو الى يعمل اعلانات جوجل والى ماسك الفيس هوا نفسه الى يعمل اعلانات الفيس وهكذا وده لانهم الاكثر دراية بالتخصص بتاعهم _ والرأى الثالث بيقول حفاظا على الاموال الطائلة الى بتصرف على الاعلانات احنا هنجيب حد متخصص فى الاعلانات فقط بشكل عام كل دورة يعمل اعلانات وبس ” وفيه اراء تانيه اكتر ولكن كل الاراء اجمعت عموما على ان مواصفات الشخص الى بينفذ الحملات الاعلانية هيا الخبرة الكافية والامانه والدراية بالعمل .
.
3_ السؤال الثالث : طيب فين بقى دور المصممين والمبرمجين والحجات الى متكلمتش عنها دى ؟
الاجابه : زى ما قولت فوق دى وظائف منفصله مش جزء من قسم التسويق الالكترونى ولكن قسم التسويق الالكترونى بيحتاج خدماتهم من وقت لأخر , الا فى حالة الشركات الكبيرة جدا الى طبعا ميقدروش يتعاملو فرى لانس مع الوظائف دى فـ بيضطر يدمجوهم مع قسم التسويق زى الشركات الى بتحتاج يوميا تصميمات جديده للعمل فى الحالة دى توظيف مصمم جرافيك وضمو لقسم التسويق افضل واسرع واوفر وفى حالة شركات تانيه بتعتمد على المواقع وتطبيقات الموبايل وما الى ذلك ؟
.
4_ السؤال الرابع : طيب انا كـ شخص بقى مفهمش الكلام ده كله يدوب عندى محل او معايه منتج عاوز اسوقو اعمل فيه فى التوهان ده كله ؟
الأجابة : ف الحقيقة اجابة السؤال ده اطول واكبر مما يتخيل اى شخص ولكن بختصار فـ كل الحجات الى فوق دى مع بعضها يطلعو فى الاخر مصطلح ( التسويق الالكترونى ) الى بيقوم عليه شركات واعمال كتير فى كل مكان فى العالم لكن بعض الاعمال البسيطه اكيد معندهاش القدرة على كل ده فـ بتكون محتاجه لـ جزء صغير من مجال التسويق عموما زى جزء الاعلانات مثلا فى الحالة دى بيشوفو شخص جدير بالثقه وغزير بالعلم والمعرفة والخبرة فى انه ينفذ الجزء ده من العمل مقابل مال مناسب لنفيذ الخدمه دى وبيكون امام صاحب العمل هنا حاجه من التنين ” اولا ياما يكون عارف تحديدا هوا محتاج ايه بظبط وبالتالى بيروح على الشخص المناسب ويقوله اعملى كذا بظبط وبيكون هوا الى بيتحمل المسؤلية _ ثانيا او بيكون مش عارف اصلا هوا محتاج ايه عشان يوصل لهدفو وفى الحالة دى بيروح برده لشخص مناسب عنده الخبرة الكافية وبيطلب منه يعملو خطة تسويق او بالبلدى كده يعرفو هوا محتاج ايه عشان يوصل لهدفو .
.
واخيرا نصيحة لوجه الله تعالى ف الاوقات الحساسه الحالية :
انا هنا مش بتكلم عن النصابين او المحتالين او مدعى الخبرة لاء دول مش جزء من كلامى , انا هنا بتكلم عن الاشخاص الكويسين بالفعل , لازم تعرف ان الشخص ده مش بيدخل جيبو فى الاخر غير المقابل المتفق عليه مقابل عمله او الخدمات الى هيقدمهالك فـ لما تقول لحد هدف ويقولك الحجات الى انتا محتاجها عشان توصل للهدف ده بلاش تفاصل معاه هوا لا بياخد حاجه لنفسو ولا مزاج عنده يدفعك فلوس اكتر ولكن الهدف الى انتا عاوز توصلو هوا الى محتاج الحجات دى فـ كونك تحاول تأثر عليه عشان يقلل الحجات دى او التكاليف لو وافق ف ده معناه انو اولا كده منافق وبيضحك على نفسه قبل ما يكون بيضحك عليك ثانيا ان التقليل ده هينعكس عليك وعلى شغلك , وفى احسن الاحوال والاشخاص الى حابين يشتغلو بما يرضى الله بيريح العميل لكن على اتفاق ان العميل هوا الى هيتحمل نتيجة اختياراته مش الى هينفذ .
.
بعتذر على الأطاله واتمنى لو قدرت افيد شخص انو فقط يدعيلى دعوه بظهر الغيب مش اكتر
